Juan-Maré Hanekom (14, links), Marelie Genis (14, middel) en Jo-Ann Ros­souw (15), almal van Oudts­hoorn, doen lekker inkopies op die feesterrein. “Daar is net te min stalletjies wat klere verkoop,” kla hulle.

Leselle Kruger van Worcester kom die afgelope ses jaar KKNK toe. Sy was gister baie tevrede met haar inkopies en is ook tevrede met die groot verskeidenheid wat die uitstallers vanjaar bied.

Robbie Ferreira van Kleinmond kom elke jaar sy naamborde hier verkoop. Hy is baie tevrede met sy staanplek, waarvoor hy vanjaar R8 500 betaal het.

Johan Liebenberg verkoop biltong by sy stalletjie op Queen’s Mall se parkeerterrein. Hy meen die feit dat feesgangers nie vanjaar hier kan parkeer nie, beïnvloed verkope.

Colin van Rensburg van Somerset-Oos het een van die duurste stalletjies op die KKNK. Saam met hom is Martha Jansen, sy regterhand.

Sandi Hitchens van Kaapstad meen daar is vanjaar te veel stalletjies in die De Jager-sportkompleks wat juwele verkoop.

Kwasi Asamoa, oorspronklik van Ghana, bedryf heeljaar deur sy stalletjie buite Queen’s Mall. Hy meen egter dat verkope vanjaar afgeneem het.

Marius Barnard van Wolseley woon vanjaar die fees vir die agtste keer by. Hy meen daar is minder stalletjies vanjaar, maar die gehalte en pryse is steeds goed.