EK is ’n gereelde leser van Die Burger, maar die laaste ruk begin ek wonder of dit nog die moeite werd is om elke jaar weer in te teken.

Dit wil vir my voorkom of die koerant sy redaksionele beleid stilweg verander het om te beweeg in die rigting van ’n poniekoerant. In die laaste paar weke is ons telkens getrakteer met ’n groot foto van Najwa Petersen op die voorblad saam met al die beweerde onheilighede rondom die moord. Daar was ’n stroom briewe om te sê die lesers het nou genoeg gehad daarvan. Toe kry Joost van der Westhuizen sy beurt met nog ’n yslike foto en sy nie-so-voorbeeldige optrede by die landgoed se hek.

Maar sowaar, vandag (2 Mei) se uitgawe van Die Burger vat die koek. Toe ek die voorblad-opskrif lees, het ek lus gehad om te vra: “Steve wie?”

Is ek heeltemal uit die pas met die res van die lesers of sou die meeste lesers werklik in die soort snert belangstel? Wie stel regtig belang in Hofmeyr se gekruide skeltaal en sy vetes met ander mense en wie sou tog geïnteresseerd wees in wat ene Gavin Prins van Hofmeyr dink?

Ooglopend is dit ’n gesoek na sensasie om die koerant te verkoop aan ’n klompie nuuskieriges terwyl dit baie ander lesers van die koerant die josie in maak.

Ek besef terdeë dat mense se smaak en belangstellings verskil en die redakteur sal wel redeneer dat die koerant vir alle belangstellings voorsiening moet maak, maar daar is darem grense wat nie oorskry behoort te word nie. Skuif asseblief volgende keer vir Hofmeyr na bladsy 4 en maak die beriggie klein.

JVS van die STRAND