’n Rooskleurige toekoms is vir JP Duminy voorspel sedert hy sy eersterangse buiging as ’n 17-jarige vir die Westelike Provinsie gemaak het.

Nie eens sy grootste bewonderaar sou egter sommer kon voorsien presies wat sy impak in sy eerste toetse – teen geen geringe span nie – sal wees.

Hy het verlede week die wenlopies in die ongelooflike sege in Perth teen die Australiërs geslaan en het Sondag met sy 166 lopies Suid-Afrika die geleentheid gegee om sy eerste reekssege ooit in Australië te behaal.

Dit is maar nog net weer eens ’n bewys van die ongelooflike sporttalent waaroor die land beskik.

Duminy se sukses is egter ook ’n triomf vir Suid-Afrikaanse krieket se transformasieproses. Nie omdat hy as ’n gekleurde speler gekies is nie, maar juis omdat hy die laaste paar jaar reeds die beste jong speler in plaaslike krieket was en sy loopbaan goed bestuur is.

In die verlede sou ’n jong speler met sy vermoëns haastig en vinnig in die nasionale span opgeneem word om die transformasiekritici stil te hou. In die harde wêreld van toetskrieket sal jou teenstanders jou egter baie gou uitvind as jy nie geestelik reg is om op daardie vlak te speel nie.

Duminy het die laaste 15 maande saam met die Proteas se toetsgroep getoer en gewag vir sy kans. Hy het dit gekry en vir almal gewys tot wat hy in staat is – geduld gemeng met vaardigheid is ’n plofbare mengsel.