Kaboel. – Pakistan se intelligensie-agentskap help die Taliban om oproer in Afganistan voort te sit, het die bevelvoerder van die Noord-Atlantiese Verdragsorganisasie (Navo) hier gesê. In sommige dele van die land was daar vanjaar weens die insurgensie 50% meer aanvalle.

Die getal buitelandse vegters, wat Europeërs insluit, het ook toegeneem terwyl Navo se internasionale sekerheidsbystandsmag steeds soldate kort, het genl. David D. McKiernan die naweek gesê.

“Daar is beslis ’n mate van IDI- (Interdienste-Intelligensie-)medepligtigheid in die militantegebiede in Pakistan en organisasies soos die Taliban,” het hy aantygings van onder andere pres. Hamid Karzai van Afganistan beaam.

“Ek kan nie sê tot op watter vlak van leierskap dit gaan nie, maar daar is aanduidings van IDI-medepligtigheid . . . dermate dat hulle dinge vir die militante groepe wat uit die stam­gebiede in Pakistan kom, vergemaklik.”

Karzai het die IDI direk daarvan beskuldig dat hy die onluste in Afganistan aanvuur, maar Pakistan het dié beskuldiging verwerp.

McKiernan het gesê die onluste woed deels omdat Afgaanse en internasionale troepe in nuwe gebiede inbeweeg het. Opstandelinge het ook hul taktiek verander. Hulle werk nou in kleiner groepe en voer meer aanvalle uit terwyl militante-toevlugsoorde in Pakistan toegelaat is om te groei en nou meer vegters oor die poreuse grens stuur.

“Ongelukkig sien ons meer nie-Pasjtoen en nie-Afgaanse vegters as verlede jaar.” Die oproer sou “redelik vinnig” gehanteer gewees het as die Afgaanse grens veilig was en dit van die Afgane afgehang het.

Hy het gesê die opstandelinge sal waarskynlik volgende jaar se presidentsverkiesing probeer ontwrig en hy sal moontlik ekstra troepe aanvra. Navo se bystandsmag het meer soldate nodig sodat hulle sekerheid kan bied en Afgaanse sekerheidsmagte kan oplei.

Die duur van die sending van Navo se bystandsmag hang af van wanneer Afganistan die bestuur van sy eie sekerheid kan oorneem.