Washington. – Dit is die aanbreek van ’n nuwe begin vir Amerikaanse leierskap om die uitdagings van die 21ste eeu te bowe te kom, het mnr. Barack Obama gesê toe hy sy nuwe veiligheidspan aangekondig het.

In wat as Obama se “oorlogskabinet” bestempel is, het hy sen. Hillary Clinton, sy Demokratiese teenstander vir die Withuis, as sy minister van buitelandse sake aangewys en pres. George W. Bush se Pentagon-hoof, mnr. Robert Gates, as minister van verdediging behou.

Dr. Susan Rice, assistent-sekretaris van buitelandse sake, is sy ambassadeur in die Verenigde Nasies (VN), ’n posisie wat hy weer ’n volle kabinetspos maak. Goew. Janet Napolitano van Arizona is die minister van binnelandse veiligheid en genl. Jim Jones, oudhoof van die mariniers, sy veiligheidsadviseur.

Obama het met dié aankondiging in Chicago sy eerste blik gewerp op sy buitelandse beleid ná sy verkiesing as Amerika se 44ste president toe hy gesê het die land sal sy ver­moëns versterk om sy vyande te verslaan en sy vriende by te staan. Amerika moet sterk tuis én oorsee wees.

Sy ekonomiese krag moet sy militêre krag, sy diplomatieke hefboom en sy globale leierskap kan onderhou.

“Ons sal ou alliansies hernu en nuwe en langdurige vennootskappe vorm. Ons sal die wêreld weer wys dat Amerika genadeloos is in die verdediging van sy mense, standvastig is in die uitbreiding van sy belange en verbind tot die ideale wat as ’n baken vir die wêreld dien: demokrasie en geregtigheid, geleentheid en onwrikbare hoop – want Amerika se waardes is sy beste uitvoerproduk.”

Obama het gesê vir Amerika onder hom om suksesvol te wees, sal ’n nuwe strategie gevolg moet word wat alle elemente van Amerika se krag inspan en balanseer: sy militêre krag en sy diplomasie, sy intelligensie en wetstoepassing, sy ekonomie en die mag van sy morele voorbeeld. Die span wat hy saamgestel het, is uniek geskik daarvoor.

Hy het gesê Clinton beskik oor ’n buitengewone intelligensie en taaiheid en ook ’n merkwaardige werksetiek.