Washington. - Die eerste vooruitskouingsverslag wat sen. Barack Obama, aangewese Amerikaanse president, onder oë kry, skets ’n donker prentjie van die wêreld waarin talle mense na hom sal opsien vir leierskap.

Amerika se oorheersing kan eindig, met nuwe rolspelers soos China, Indië en Rusland wat die septer kan swaai.

“Die volgende 20 jaar van oorgang lê besaai met risi­ko’s,” lui die National Intelligence Council (NIC) se toekomsblik Global Trends 2025.

Dit skets in kort ’n tyd propvol konflik oor “hoogs strategiese hulpbronne” soos krag, kos en water. Die vraag na kos sal volgens die Wêreldbank teen 2030 met 50% toeneem.

Voeg daarby meer lande met kerntegnologie en die wêreld is gereed vir bitter botsings. Die middelpunt van konflik bly die Midde-Ooste.

Aardverwarming gaan sorg vir ekstra spanning met “omstandighede wat moeilik sal wees om te beheer”.

Die NIC se boodskap is dat wêreldleiers die voorspellings kan verhoed deur daadwerklik op te tree.

Nuwe tegnologie soos alternatiewe vir fossielbrandstowwe kan kos- en waternood verlig, maar die huidige tegnologie is onvoldoende.

Onder die voorspellings is dat terreurgroepe soos Al-Kaï­da gaan verminder, maar dat die dodelikheid van aanvalle deur ekstremiste kan toeneem weens beter wapens.

Amerika sal sy militêre voorsprong behou, maar gaan al meer uitgedaag word op wetenskaplike en tegnologiese gebied, ook deur “ongewone gevegstaktiek”. “Kuberoorlogvoering” sal toenemend Amerika se vryheid beperk.

Suid-Afrika – en die hele Suider-Afrika – word aangedui as ’n streek wat “waterskaarste nader” en waar meer as 60% van die rivierwater benut word.

Afrika suid van die Sahara gaan toenemend onstabiel raak, tensy daar volhoubare internasionale betrokkenheid is.

Suidelike Afrika sal die mees stabiele en belowende substreek in Afrika wees.