Mogadisjoe. – ’n Indiese oorlogskip het ’n seero­werskip in die Golf van Aden verwoes en gewapende Somaliërs het op nog twee vaartuie beslag gelê, ondanks ’n groot internasionale vlootteenwoordigheid in dié berugte seewaters.

Die seerowers het sedert Sater­dag se skouspelagtige kaping van ’n Saoedi-Arabiese olietenkskip met $100 miljoen se olie in sy vrag­ruim ook beheer geneem oor ’n vissersboot uit Thailand, ’n Griek­se vragskip en ’n skip wat onder ’n Hongkongse vlag onderweg na Iran was.

Die kaping van die Saoedi-olie­tenkskip word as die grootste skipkaping in die geskiedenis beskou.

Volgens Saoedi-Arabië is die eie­aars in gesprek met die kapers oor ’n moontlike losprys – ondanks voorbehoude oor onderhandelings met kapers. Iran het ook probeer kontak maak met die Hongkongse skip wat hy gehuur het om graan in te voer.

Die skerp toename in seerowery vanjaar het versekeringskoste die hoogte laat inskiet en tot gevolg gehad dat sommige skeepvaartmaatskappye hul roetes deur die Suezkanaal wysig en eerder via Suid-Afrika vaar. Dit het ook ’n sterk militêre reaksie van Navo en die Europese Unie ontketen.

“Die seerowers stuur ’n boodskap na die wêreld uit dat hulle kan doen wat hulle wil, en die ondenkbare en onverwagse kan uitvoer,” het mnr. Andrew Mwangura, koördineerder van die Oos-Afrika-seevaarders-on­der­steu­nings­­pro­gram in Mombasa, gesê.

Die Indiese vloot het gesê een van sy oorlogskepe het ’n seero­werskip in ’n kort geveg verwoes.

“ ’n Brand het aan boord van die vaartuig uitgebreek en ontplof­fings is gehoor, moontlik weens ammunisie op die vaartuig wat ontplof het,” het die Indiese vloot gesê.

Die Somaliese premier, mnr. Noer Hassan Hoesein, het gesê vlootpatrollies sal nie seerowery keer nie en hy het ’n beroep gedoen dat meer gedoen word om misdaadnetwerke vas te vat.

Terwyl ontleders sê die uitbeta­ling van lospryse vererger seero­wery, het die eienaars van die supertenkskip Sirius Star met die see­rowers begin onderhandel.

“Ons hou nie daarvan om te onderhandel met kapers of terro­riste nie, maar die eienaars van die tenkskip besluit finaal wat gedoen word,” het Saoedi-Arabië se minister van buitelandse sake, prins Saoed al-Faisal, gister gesê.