YINGXIU. – Die dodetal weens die aardbewing in China kan tot meer as 50 000 styg, het die staatsmedia gister berig terwyl reddingswerkers oorlewendes uit die puin probeer help het.

Drie dae ná die skudding vervaag die hoop vinnig vir duisende wat onder die rommel vasgekeer is.

Die jongste dodetal van sowat 20 000 is bevestig ná Maandag se massiewe skudding wat 7,9 op die Richterskaal geregistreer het.

In die dorp Yingxiu, naby die episentrum in die provinsie Sichuan, lyk 90% van die geboue onveilig.

Zhang Yuejiao (18) het uit haar skool gehardloop terwyl dit in duie gestort het. “Ons wag om te hoor wat met my broer gebeur het,” het sy kalm gesê. “Sy skool het in duie gestort en ons kan hom nie kry nie.”

Helikopters kom land elke 15 minute om die beseerdes weg te neem. Soldate het 40 km gestap om te kom help.

Die Kommunistiese Party het amptenare opdrag gegee om “sosiale stabiliteit te verseker”. Die krisis gaan gepaard met gerugte oor chemiese lekkasies, vrese oor gebarste damme en tallose tonele van desperate mense.

Nagenoeg 130 000 soldate het gehelp met die soek-en-reddingspogings in die puin van tientalle dorpe.

Meer as 12,5 ton noodlenigingsgoedere is per valskerm neergelaat. Volgens amptenare is voedsel, tente en satelliettelefone die dringendste nodig.

Talle inwoners in die gebied wat die ergste getref is, het gekla dat hulle min kos het en noodgedwonge besmette water drink. – Reuters