Vatikaanstad. – In die moderne samelewing word seks ’n dwelm en die menslike liggaam word ’n voorwerp wat bloot gekoop en verkoop kan word.

So het pous Benedictus XVI Saterdag gewaarsku.

Om die eenheid van liggaam en gees uit die oog te verloor, kan daartoe lei dat die waarde van ’n persoon verlore gaan en dat mense aan die ernstige gevaar blootgestel word om die liggaam as ’n objek te beskou wat gekoop en verkoop kan word, het die leier van die Rooms-Katolieke Kerk gesê.

In sy rede, wat die 40ste herdenking van die pouslike sendbrief Humanae Vitae gevier het, het hy ook gesê dat, sou seks ’n dwelm word waarin jou maat onderwerp word aan jou eie begeertes en behoeftes, die kerk nie slegs die konsep van die liefde nie, maar bowenal die konsep van menswaardigheid moet verdedig.

Die vrugbare kombinasie van liefde en die verstand behoort dringend herontdek te word, het hy gesê, en die hoop uitgespreek dat jong mense in staat sal wees om die ware betekenis van liefde te leer en hulle met behoorlike seksopvoeding daarop sal voorberei. – Sapa-AFP