Jangon (Mianmar). – Sikloon Nargis het die dodetal hier volgens die staatsbeheerde media tot sowat 15 000 laat styg.

Honderde duisende mense is na wat berig word dakloos gelaat.

Altesame 10 000 mense het volgens die staatstelevisie in die dorpie Bogalai, in die laagliggende Irrawaddi-rivierdelta, omgekom. ‘n Paar duisend inwoners word nog vermis. Dié omgewing is die ergste deur die storm getref.

Die regering het die landwye dodetal van Saterdag se sikloon aanvanklik in die honderde geraam, maar het dié syfer sedertdien deurlopend aangepas.

Die storm, met windsnelhede van tot 200 km/h, het honderdduisende mense dakloos en sonder skoon drinkwater gelaat, het mnr. Richard Horsey, ’n woordvoerder van die VN se kantoor vir die koördinering van humanitêre aangeleenthede, gesê.

Jangon, die land se grootste stad, is sonder elektrisiteit, behalwe waar gasaangedrewe opwekkers beskikbaar is. Die meeste paaie is met puin besaai.

Thailand, die buurland, het aangekondig dat hy vandag hulp sou stuur.

Die regering het die internasionale gemeenskap om hulp gevra. World Vision, ’n private hulporganisasie, is versoek om sinkplate, tente, dekseile en medisyne te stuur.

World Vision het in ’n mediaverklaring gesê hy werk saam met regeringsamptenare om noodvoorraad in te vlieg. Weens swak kommunikasiedienste en paaie wat deur die storm verspoel is, is die situasie in landelike gebiede onbekend. – Sapa-AP