GENÈVE. – Hy is diep bekommerd oor die stygende vlakke van geweld en intimidasie in Zimbabwe, het die sekretaris-generaal van die VN, mnr. Ban Ki-moon, gesê.

Hy het gister ’n beroep op Afrika-leiers gedoen om die verkiesingskrisis vinnig en vreedsaam by te lê.

Ban het aan verslaggewers gesê hy beraadslaag met leiers van die Afrika-Unie en die Suider-Afrikaanse Ontwikkelingsgemeenskap oor hoe dié organisasies die situasie kan help oplos.

Hy het gesê van die idees wat hy wil bespreek, is om VN-gesante en VN-verkiesingsmonitors na Zimbabwe te stuur vir ’n uitklop-verkiesingsronde.

Volgens die Zimbabwiese Verkiesingskommissie het mnr. Morgan Tsvangirai, opposisieleier, 47,9% van die stemme op hom verenig in die presidentsverkiesing – meer as pres. Robert Mugabe, maar nie ’n volstrekte meerderheid nie.