PORT ELIZABETH. – Byna 1 000 opgewonde jong krieketspelers was gister hier op St. Georgepark vir ’n landwye poging om ’n Guinness-wêreldrekord op te stel vir die meeste kinders wat gelyktydig krieket speel.

Die meer as 6 000 kinders landwyd hét toe die rekord verbeter.

Die byeenkoms is deel van Bakers se 25ste jaar wat hy mini-krieket borg. Bakers-minikrieket is die oudste georganiseerde minikrieketprogram ter wêreld. Deur die jare heen was meer as 2 miljoen spelers al betrokke.

Kinders van tussen 6 en 12 jaar oud het gister op agt velde landwyd gespeel.

“Ek sien só ’n helder toekoms vir ons jeug as ek aanskou hoeveel talentvolle kinders vandag hier is,” het me. Ethel Sikwe­yiya, van die departement van sport en kultuur van die Nelson Mandelabaai-metropool, gesê.

Shaun Pollock, Mark Boucher en Makhaya Ntini het ook in hul jong dae minikrieket gespeel het.

J.P. Duminy van die Cape Cobras het gesê dit gee jong spelers die geleentheid om kinders uit ander gemeenskappe te ontmoet, terwyl mnr. Nabeal Dien, die hoof van die WP-krieketvereniging se amateur-afdeling, gesê het dit hou kinders besig, kweek ’n liefde vir die sport en gee hulle die geleentheid om basiese krieketvaardighede aan te leer.