PORT ELIZABETH. – Reddingswerkers moes hulle gister na die Baaise lughawe haas toe ’n Boeing 737 hier “neergestort” het.

Die vliegtuig was op pad na die O.R. Tambo-lughawe in Johannesburg. Daar was altesaam 144 passasiers en ses bemanningslede aan boord..

Gelukkig is niemand in die voorval beseer nie, omdat dié ongeluk net ’n oefening in rampbestuur vir die lughawe was. Volgens die voorskrifte van die Suid-Afrikaanse Lughawens­maat­skappy (Acsa) moet lughawens elke twee jaar só ’n uitgebreide noodhulpsessie aanpak.

Lede van die publiek, wat gister by die lughawe rondgedwaal het, het verward na die toneel gestaar. Aan party van hulle moes werkers verduidelik dat die “passasiers” en “slagoffers” eintlik almal leerders van die Hoërskool Victoria Park is.

Nooddienste, waaronder die brandweer, weermag, polisie, die Nelson Mandelabaai-munisipaliteit se afdeling vir rampbestuur en ambulansdienste is omstreeks 08:00 na die lughawe ontbied. Mnr. Kupido Baron, ’n munisipale woordvoerder, het gesê die metropool se omgewingsdepartement sal ook in só ’n geval ontplooi word indien ’n oliestorting plaasvind.

Lede van die media het op ’n skyn­inligtingsessie al die besonderhede ontvang.

Die inligtingsessie is deur mnr. Lucas Letsholonyane, bestuurder van die lughawe, behartig.

In die simulasie het ’n vliegtuig, wat reeds opgestyg het, probleme ervaar. ’n Noodoproep is na die lughawe se radiobeheer uitgestuur en die vliegtuig is versoek om terug te keer.

Die vliegtuig het kort daarna op die aanloopbaan “neergestort”.

In die oefening moes noodwerkers hand bysit om 62 dooie en 36 ernstig beseerde “slagoffers” uit die wrak te help. Die res is ongedeerd.

Letsholonyane het gesê dit kan soms maande duur om die oorsaak van ’n vliegtuigongeluk te bepaal. Hy het gesê die “ondersoek” word deur Acsa en die polisie behartig.

Die doel van die oefening is om die lughawe se gereedheid vir moontlike vliegongelukke te toets.