PORT ELIZABETH. – Die omstrede sakeman Jan Faure is gister in die Baaise landdroshof tot 15 jaar tronkstraf gevonnis nadat hy vroeër op tien aanklagte van bedrog skuldig bevind is.

Faure het in Julie 2005 die Seaview-hotel onder valse voor­wendsels by ’n Neder­land­se sakeman, mnr. Barend de Ronde, gekoop.

Die hotel, wat op ’n eiendom van 1,8 ha met ’n asemrowende see-uitsig geleë is, is aan Faure verkoop vir R14 miljoen.

Faure het aan De Ronde gesê hy is die eienaar van ’n wildplaas ter waarde van R30 miljoen in Marble Hall en het ook voorgegee die plaas is ver­band­vry.

Hy was daarna vir twee maande in die beheer van die Seaview-hotel. De Ronde het ook die onderneming se bates aan hom oorhandig.

Faure is kort daarna in hegtenis geneem nadat hy die hotel se bates begin verkoop het sonder om die volle koopprys aan De Ronde te betaal.

Faure het ook opknappingswerk aan die hotel laat doen, maar het versuim om van die kontrakteurs te betaal.

Verder het hy nuwe personeellede aangestel.

De Ronde het twee maande later die kooptransaksie gekanselleer, aangesien Faure versuim het om die koopvoorwaardes na te kom.

Die Seaview-hotel is later in 2005 vir R15,4 miljoen aan die Kat Leisure-groep verkoop, het mnr. Duncan McLaggan van dié kettinggroep gesê. –Euline Fillis