KNYSNA. – Mnr. Shaun van Eck, tans die bestuurder van die Boardwalk-casino in Port Elizabeth, is aangestel as die nuwe bestuurder van Knysna-toerisme.

Hy sal op 1 Julie diens aanvaar. Van Eck is in 2000 aangestel as ­bemarkingsbestuurder van die ­ca­si­no. Hy was voorheen die ­di­rek­teur van toerisme in Port ­Elizabeth.

Hy het ook vroeër ’n program aangebied op Algoa FM en is ’n ­direksielid van Nelson Mandelabaai-toerisme en Ectour, ’n private organisasie vir die ­bemarking van toerisme met lede ­oor die hele Oos-Kaap.

Van Eck was bevriend met mnr. Craig Nancarrow, die ­vo­ri­ge bestuurder van Knysna-toerisme wat vroeër vanjaar aan ’n hartaanval oorlede is.

“Craig en ek was baie saam oorsee en het tyd bestee om die ­suksesverhale van elke bestemming te bestudeer. Ons het altyd na meer innoverende maniere gesoek om ons bestemmings te bemark. Dit is vir my ’n eer om op Craig se ­nalatenskap voort te bou,” het hy gesê.

Volgens hom is Knysna een van die gewildste “sielsbestemmings”.

“Ek het nog altyd sielskos gevind wanneer ek hiernatoe wegbreek. Ek sien uit daarna om saam met die toerismespan van Knysna te werk om toerisme verder te bevorder.

“Ek is ook ’n ywerige gholfspeler, ­natuurliefhebber en kampeerder, dus sien ek baie daarna uit om na Knysna te verhuis.”

Van Eck se vrou, Beverley, is die organiseerder van die Home­maker’s Fair Expo in Port ­Eliza­beth. – Suid-Kaapse redaksie