GEORGE. – Nóg ’n groot politieke party gaan die politieke water op 21 Mei in dié dorp toets.

Die ACDP het bevestig dat hy kandidate gaan stel in die twee tussenverkiesings.

Mnr. Jeffrey Roberts (37) dra in wyk 8 (Parkdene en Maraiskamp) die ACDP-vaandel en mnr. Steven Jantjes (38) in wyk 5 (Lavalia en Rosemoor).

Die ander groot partye soos die ANC, die DA en die OD het vroeër reeds die name van hul kandidate bekend gemaak.

Drie onafhanklike kandidate gaan ook probeer om George se kiesers in die wyke oor te haal om vir hulle te stem.

Roberts sê daar word voortdurend beloftes gemaak en die kiesers is moeg daarvan.

Hy maak nie ’n geheim van sy Christelike oortuigings nie en durf die politiek ook so aan. “Die Kruis is ons laaste pad,” sê hy.

Roberts het grootgeword in Parkdene. Ná skool het hyin die versekeringsbedryf en by ’n skoenfabriek gaan werk.

Later het hy betrokke geraak by teologie en as ’n pastoor gekwalifiseer. Hy is die leier van ’n gemeente in Parkdene.

“Ek weet wat die behoeftes van ons gemeenskap is. Daar is probleme soos armoede, werkloosheid en sjebien-huise.”

Hy wil nie net kritiseer nie, maar ook help. Daar is geen jeugaksie wat jong mense positief kan besig hou in die wyk nie.

Jantjes is ’n bakker by ’n bekende kettingwinkelgroep in die dorp.

Hy beoefen die beroep al 15 jaar en het besluit om hom verkiesbaar te stel, want hy wil gemeenskapsbetrokkenheid bevorder.

Hy is gebore en getoë in George.

Jantjes glo daar is ’n groot kloof tussen die gemeenskap en die stadsraad. Hy wil dit oorbrug.

Die probleem is dat as raadslede eers verkies is, vergeet hulle van die kiesers, sê hy. Die grootste uitdagings in die wyk waar hy staan, is werkloosheid en misdaad.

Daar is ook kinders van byvoorbeeld 10 jaar wat nie skool toe gaan nie. Niemand vra ooit daaroor nie.

In sy werwingswerk tel hy op dat mense onseker is vir wie hulle moet stem. Deel van sy veldtog is gerig op gemeenskapsbetrokkenheid.

Sport is ’n belangrike instrument om betrokkenheid te bewerkstellig en te bevorder, glo hy.