PORT ELIZABETH. – Ernsti­ge kommer is hier uitgespreek oor hondegevegte wat nie net besig is om handuit te ruk in die Baai nie, maar wat ook reeds na plekke soos Uitenhage en Grahamstad uitgebrei het.

Vir die polisie en diereliefhebbers is die situasie al só erg dat ’n spesiale vergadering Dinsdag gehou is oor moontlikhede om dié gevegte te probeer hokslaan.

Kapt. Thys de Beer, hoof van die bedreigdespesie-groep by die polisie se eenheid teen georganiseerde misdaad in die Baai, het op die vergadering gemaan dat hondegevegte ook hier – net soos in Gauteng en die Wes-Kaap – buite beheer kan raak as dié probleem nie nou getakel word nie.

In die meeste gevegte word Amerikaanse veghonde na bewering gebruik.

Volgens De Beer word daar hoofsaaklik op die hondegevegte gewed.

Honde-eienaars en toeskouers het hier die geleentheid om onder meer hul huise, motors, selfone en groot bedrae kontant op die spel te plaast, het hy gesê.

“In die meeste gevalle is dit ook georganiseerde misdadigers wat aan die stuur van die gevegte is,” het hy bygevoeg.

Hondegevegte word in verskeie kategorieë verdeel – die eerste, tweede, derde en die kampioenskapswedstryd.

Die honde word gewoonlik eers vir twee jaar deur hul eienaars opgelei. Hulle word van selfs drie maande oud opgelei, het De Beer gesê.

Die honde moet eers twee jaar as beginners veg.

Die gevegte duur gewoonlik een tot twee uur. Die plek waar die gevegte gehou word, verander ook dikwels, het hy gesê.

Nagenoeg 70 mense, onder wie talle vrywillige werkers by diere-organisasies, het die vergadering in die Walmer-stadsaal bygewoon.

De Beer en me. Linda-Louise Swain van die Bond teen Dierewreedheid het ’n beroep op die teenwoordiges gedoen om ten nouste by die stryd teen hondegevegte betrokke te raak.

Hulle is aangemoedig om die breër gemeenskap beter in te lig oor die onwettigheid van hondegevegte.

Afskrifte van die Strafproseswet teen dieremishandeling en -gevegte is uitgedeel en die men­se is aangemoedig om dit ook in hul woongebiede te gaan uitdeel.

Diegene wat hulle aan die organisering of beoefening van hon­degevegte skuldig maak, kan twee jaar agter tralies sit of ’n boete van nagenoeg R2 000 opgelê word.