Die Burger | Nuus: Streek | SUID-KAAP: Kleinboere kry grond by Matjiesrivier

OUDTSHOORN. – Altesame 27 kleinboere van Matjiesrivier net buite dié dorp gaan binnekort eiendomsreg van hul grond kry.

“Ons is dankbaar en opgewonde oor wat in die Klein-Karoo gebeur, veral omdat Oudtshoorn een van die 21 brandpunte is wat die premier (mnr. Ebrahim Rasool) geïdentifiseer het,” het mnr. Cobus Dowry, Wes-Kaapse minister van landbou, gister gesê.

“Die 27 boere het die grond by hul voorvaders geërf, maar dit is nog nooit op hul naam geregistreer nie,” het mnr. Juan Lategan, ’n kommersiële boer van Matjiesrivier wat die dryfveer agter die projek is, gister verduidelik.

“Ek is van mening dat julle in die streek inderdaad ’n model-inisiatief van stapel stuur,” het Dowry gesê. “Wanneer opkomende boere bemagtig word, moet kommersiële boere opreg die nut daarvan besef en heeltemal inklusief daarmee omgaan.

“Om by die opheffing van plaaswerkers betrokke te wees, is nie net die regering of die landboudepartement se verantwoordelikheid nie.

“Met hierdie projek vat die regering, die kerk, die gemeenskap en die kommersiële boere hande.”

Hy het ds. Johannes Miggels en mnr. Japie Coetzee van die Verenigde Kongregasionalistiese Kerk (VKK) bedank vir die grond wat die kerk vir die bou van ’n kleuterskool afgestaan het.

Hy het ook mnr. Jans Rautenbach, die dryfveer agter die suksesvolle Vlakteplaas-kleuterskool buite De Rust, bedank vir sy hulp om die Matjiesrivier-kleuterskool te vestig.

“Ons plaaskinders het ’n agterstand, want hulle word nie aan alles blootgestel soos ons dorpskinders nie. Nou het hulle ook ’n kleuterskool wat hulle vir die primêre skool kan voorberei.”

Die plan is om die kleuterskool later tot ’n primêre skool uit te brei.

Dowry het ook kommersiële boere bedank wat grond gegee het sodat daar vir die primêre skool ’n sportterrein aangelê kan word.

Coetzee sê die VKK is in 1852 in die Matjiesriviergebied gevestig. Negentien lede van die kerk het die hele plaas Matjiesrivier vir 500 pond gekoop.

“Later, toe dit swaar gaan, is ’n stuk van die plaas verkoop,” het hy gesê.

Volgens hom is dit net gepas dat die 27 kleinboere ná al die jare juis hier eienaarskap kry van grond wat aan hul grootouers behoort het.

Dowry het ook ’n spesiale woord van dank vir mnr. Brett Pyper, hoofbestuurder van die Absa KKNK gehad, wat gereël het dat sowat 300 plaaswerkers van die KKNK-produksies bywoon. Dowry het vroeër gister ook ’n produksie deur plaaslike kunstenaars, Journey to Kannaland, bygewoon.

“Brett het ’n baie groot verskil kom maak. So twee, drie jaar gelede was daar kommer oor Oudtshoorn se mense wat nie by die KKNK betrokke is nie. Dit was lekker om vanoggend te sien hoe Oudtshoorn se eie mense betrokke is by die grootste Afrikaanse fees ter wêreld.”

Die belangrike aankondiging is by die !Garob-kuierplek langs die Grobbelaarsrivier gedoen.

Dowry en ander rolspelers is daarna op ’n volstruisnekpotjie onthaal.

Die Bitterfontein Rieldansers, onder leiding van me. Anna Booysens (63), het ook opgetree.


	NUUS		STREEK		BUITELAND		KAMPVEGTER


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|