Die Burger | Nuus: Streek | OOS-KAAP: Rooi Lokasie kry weer groot eer

PORT ELIZABETH. – Die volgende drie geboue wat deel sal uitmaak van die ontwikkeling rondom die Rooi Lokasie-museum in New Brighton sal teen 2010 voltooi wees.

Die nasionale departement van finansies het R25 miljoen uit sy gemeenskapsontwikkelingsfonds gegee vir ’n biblioteek, argief en kunsgalery by Rooi Lokasie.

Mnr. Jo Noero, van die argitekspraktyk Noero Wolff in Kaapstad, wat die museum ontwerp het, het gesê bouwerk sal binnekort begin.

Die metro se meesterplan vir die kulturele distrik sluit in ’n kunssentrum, -galery, biblioteek, ’n argief vir alle munisipale biblioteke, ’n teater en jazz-klub en ’n oornagplek vir rugsakreisigers. Van die ou kothuise in die omgewing gaan ook opgeknap word.

Die grootste deel van die perseel sal teen 2010 ontwikkel wees, het mnr. Kupido Baron, munisipale woordvoerder, gesê. Besonderhede oor die ontwikkeling sal volgende week deur die metro se staande komitee vir ontspanning en kultuur bespreek word.

Noero Wolff en die plaaslike argitekspraktyk John Blair Argitekte is onlangs deur die Oos-Kaapse Instituut vir Argitekte (ECIA) vereer as een van sy streekwenners vir die Rooi Lokasie-museum.

Noero het gesê van al die toekennings wat die museum al gekry het – dit sluit twee internasionale toekennings in – is dié een deur die ECIA baie besonders omdat dit erkenning gee vanuit die Port Elizabeth-gemeenskap.

Hy het gesê hy lig sy hoed vir die Nelson Mandelabaai-metro wat die enigste munisipaliteit in die land is wat die moed gehad het om in ’n projek soos die Rooi Lokasie-museum te belê en dit in ’n arm buurt van stapel te stuur.

Die museum se ontwerp moet in sy argitektoniese konteks gesien word en dit spreek boekdele dat die museum in die middel van Port Elizabeth se eerste gevestigde swart woonbuurt opgerig is.

Blair het gesê dit sal ’n wonderlike plek skep vir die mense van Port Elizabeth waar hulle ’n belangrike deel van die land se geskiedenis op ’n vars manier kan beleef.

Volgens Blair verdien SBT Konstruksie en sy gesamentlike ondernemingsvennoot, Alfdav-konstruksie, lof vir die bouwerk in ’n tyd waarin vaardighede skaars is.

Rooi Lokasie het sy naam gekry van die sinkstrukture wat daar opgerig is en rooi verkleur het weens roes.

Dié buurt is onder meer die plek waar die eerste sel van Umkhonto weSizwe, die ANC se militêre vleuel, tot stand gekom het.

Van die eerste inhegtenisnemings ná die passiewe verset in 1952 teen die paswette het ook daar plaasgevind.


	NUUS		STREEK		BUITELAND		KAMPVEGTER


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|