GEORGE. – Dit is ’n wanopvatting dat die Suid-Afrikaanse gholfbedryf uit ’n klomp gierige plesiersoekers bestaan wat onsensitief staan teenoor die omgewing, minderbevoorregte gemeenskappe of volhoubaarheid.

Só sê mnr. Kwakye Donkor, bemarkingsbestuurder van Fancourt, oor dié kwessies wat aanstaande maand op die derde Suid-Afrikaanse gholfberaad bespreek sal word.

Die byeenkoms, wat by Fancourt gehou word, dien as forum vir regeringsbeamptes, eiendomsontwikkelaars en toeroperateurs om oor verskillende sake rakende die spel en die bedryf te gesels.

Die fokus by vanjaar se beraad gaan veral val op die ontwikkeling van minderbevoorregte gemeen­skap­pe en die sosiaal-ekonomiese waar­­de van plaaslike gholf in die bedryf.

Volgens Donkor dra gholf baie by tot toerisme, werkskepping en die plaaslike ekonomie.

“Die gholfbedryf word dikwels uitgebeeld as onsensitief. Maar dit is onwaar. Ons kyk byvoorbeeld na die mees omgewingsvriendelike manie­re om gholflandgoedere te ontwikkel en wend ook daadwerklike pogings aan om vas te stel wat die behoeftes van plaaslike inwoners is wat ­regstreeks en onregstreeks deur gholflandgoedontwikkelings geraak word,” het hy gesê.

Mnr. Ebrahim Rasool, Wes-Kaap­se premier, sal vanjaar die gasspreker wees by die opening van die gholfberaad.

Hy sal vergesel word deur me. Tasneem Essop, die Wes-Kaapse minister van omgewing, beplanning en ekonomiese ontwikkeling, asook mnr. Moeketsi Mosola, uitvoerende hoof van SA Toerisme.

Volgens me. Ingrid Diesel, bestuurder van Fancourt, is een van die hoofdoelwitte van vanjaar se beraad om ’n verteenwoordigende liggaam vir die gholfbedryf daar te stel.

Ter voorbereiding van die gholfberaad is werksessies vroeër vandeesmaand deur ’n bestuurskomitee, wat vroeër aangestel is, in Pretoria en ­Johannesburg gehou om rolspelers se indrukke te kry.

Volgens prof. Ernie Heath van die Universiteit van Pretoria kan die gholfbedryf gebruik word om gemeenskapsontwikkeling, transfor­ma­sie en entrepreneurskap teweeg te bring, mits dit verantwoordelik ontwikkel en bemark word.

Heath sê ’n verteenwoordigende liggaam kan Suid-Afrika bemark as dié gholfbestemming in Af­ri­ka en ook met die regering skakel.

Volgens Donkor was daar reeds verskeie versoeke, veral van regeringskant, vir die gholfbedryf om ­beter regulering en interaksie tussen die onderskeie bestuurskomitees te bewerkstellig om sodoende ’n groter stem aan die bedryf te verleen.

Van die kwellings was juis dat daar nie ’n kommunikasiekanaal tus­­sen formele organisasies soos die gholfspelers, gholfbaanontwikkelaars, rolspelers in gholftoerisme en die parlement bestaan nie.

Donkor sê voorts die beraad is ­besig om ’n jaarlikse instelling te word wat die plaaslike bedryf help om deurlopend ’n betekenisvolle ­bydrae tot die Suid-Afrikaanse mark te lewer.

Wetgewing oor grondeienaarskap deur buitelanders, die volhoubaarheid van die omgewing en water­gebruik by gholfbane sal ook op die beraad bespreek word.

Die beraad vind van 20 tot 23 April plaas.