KOOKHUIS. – Talle vulletjies oor die Oos-Kaap heen is wees gelaat deur die dodelike Afrika-perdesiekte, wat die afgelope drie weke honderde merries afgemaai het.

Die Burger het vroeër berig honderde perde ter waarde van miljoene rande het die afgelope weke in die Oos-Kaap gevrek weens dié epidemie, wat glo bui­te beheer is.

Op die plaas Gallantskloof in die Bedford-distrik, waar 21 per­de reeds gevrek het, moet twee vulletjies nou bottelvoeding kry.

Mev. Ezelle Marais, president van die Oos-Kaapse Boerperd-telers en eienaar van Gallantskloof, het gesê die bottelvoeding is ’n heeltydse werk, want “elke vulletjie moet 15 tot 18 liter melk per dag inkry”.

Die vulletjies drink spesiale poeiermelk wat Marais elke uur vir hulle gee.

“Die koste beloop so R600 per sak melk. Dit hou gewoonlik so ’n maand,” het Marais gesê.

Hoewel die vulletjies reeds lusern vreet, kan hulle nie net daarop oorleef nie, het sy gesê. “Hulle sal vir nog sowat vier maande melk uit bottels drink.”

Marais en mnr. Andrew Joltand, ’n plaaswerker, staan as ouers in om die wesies groot te kry.

Bedags loop die vulletjies in ’n kampie voor die huis en, gelukkig vir dié tweetjies, het die moederlike instink by ’n ou merrie só sterk ingeskop dat hulle snags by haar in haar stal kan slaap.

Altesame 68 perde op dié plaas het tot dusver die siekte oorleef en Marais hoop die siekte het vir eers oorgewaai.

“Van die 21 perde wat ons verloor het, is twee vulmerries dood, terwyl die res tussen een- en driejarige ouderdom was,” het sy gesê.

Volgens dr. Marten Bootsma, ’n veearts in die Tsitsikamma-streek, is daar geen gevalle van perdesiekte in sy distrik aangemeld nie. “As gevolg van die klimaat kom die muggies wat die siekte dra nie in dié gebied voor nie,” het Bootsma gesê.

Nog ’n veearts, dr. Anton Kruger van Uitenhage, het gesê hy weet van geen nuwe voorvalle nie. “Ek weet wel van ’n paar gevalle waar perde wat siek is, behandel word.”

Dr. Peter Hope van die Lorraine-dierekliniek het gesê in die Baai is twee gevalle aangemeld sedert die perdesiekte uitgebreek het en dié getal het nog nie vermeerder nie.

Dr. Brendan Farrell, die veearts op Somerset-Oos wat perde in dié distrik behandel, kon nie vir kommentaar bereik word nie.