Kaapstad. - Dit is nie net Luke Watson wat daarvan kan getuig dat ’n stampvol rugbystadion ook soms ’n skadelike skadu kan werp nie.

Volgens ’n dosent aan die Universiteit van KwaZulu-Natal steek daar groot gevaar in die boodskap van die Christen-prediker mnr. Angus Buchan, wat al Loftus Vers­feld én Nuweland vir sy mega-geloofsaamtrekke ingespan het.

Dr. Sarojini Nadar, senior dosent aan dié universiteit se Skool vir Godsdiens en Teologie, het Vrydag op ’n konferensie in Stellenbosch gesê daar skuil ’n filosofie van manlike oorheersing in die boodskap van Buchan wat selfs tot geweld teen vroue kan lei.

“Ek sou argumenteer dat Buchan se Mighty Men-konferensies die nuwe weergawe van hegemoniese Afrikaner-manlikheid is wat aan ’t kop uitsteek is,” het Nadar gesê op ’n tweedaagse konferensie, “Die euwel van patriargie in die kerk, die maatskappy en politiek in Suid-Afrika”.

Derduisende mans sal na verwagting in April vanjaar op Greytown in KwaZulu Natal toesak vir die gewilde Buchan se Mighty Men-konferensie 2009.

Watson het Saterdag tydens ’n Super14-rugbywedstryd deurgeloop onder Bulls-aanhangers op Loftus Versfeld wat hom glo onder meer met die dood gedreig het.

In ’n bydrae getiteld “Wie skrik vir die ‘Mighty Men’s Confe­rence?’” het Nadar Vrydag aan ’n klein groep akademici, kerkleiers en selferkende gender-kwaadstokers gesê Buchan se teologie moet fyn dopgehou word. “Ek sou argumenteer dat teologie van hoofskap (‘headship’) en onderdanigheid net nog ’n manier is om geweld aan te moedig deur die verraderlike mite dat mans as die sterker geslag vroue moet beskerm of hul oor die swakkes moet ontferm.”

Nadar het gesê Buchan en sy magtige mans behoort gevrees te word. Volgens haar kan sy boodskap toehoorders op die valse spoor plaas van wat dit werklik sou beteken om ’n man te wees deur te verwys na uitgediende, ­afbrekende wyses van manwees waar vroueregte ingeboet word.

Die konferensie is gereël deur die drukgroep Inclusive & Affirming Ministries.

Buchan was nie gister vir kommentaar beskikbaar nie, volgens sy woordvoerder, me. Bianca Ortman.