Orania. - ’n Inwoner (18) van dié dorp het ’n brief van die dorpsraad gekry dat sy die dorp moet verlaat omdat sy nie die reëls nakom nie.

Van die redes is glo dat sy by haar verloofde (29) woon en dat sy glo vloek.

Intussen het me. Lezaan Pretorius (18) ’n saak van aanranding teen haar voormalige werkgewer op die dorp aanhangig gemaak. Sy meen dít is die rede hoekom sy uit die dorp gejaag word.

“Die man het my aan my arm gegryp en buite toe geruk. Ek het nie die volgende dag teruggegaan nie. Ek gaan nie die kans waag om weer rondgepluk te word nie.”

Pretorius het gesê sy en haar verloofde beplan om einde Januarie te trou.

“Ek het Donderdag ’n brief van die dorpsraad ontvang dat ek twee weke het om uit die dorp te trek. Volgens die brief het ek drie maande verblyfreg gehad, maar het ek nie die reëls nagekom nie. Ek het nêrens anders om te woon nie. Daar is nie behuising in Orania nie, so wat moet ek doen?”

Die dorpsraad het Donderdagmiddag vergader en besluit dat Pretorius ’n reg op appèl het.

“Ek kan nou appelleer en redes aanvoer hoekom ek hier wil bly. Ek het nou nie meer werk nie en gaan steeds by my verloofde bly.

“Die polisie het vir my gesê dit is my adres en dit is waar hulle my gaan kom soek.”

Sy het gesê haar verloofde is baie ongelukkig oor die voorval.

“Die mense gun niemand ’n plekkie in die son nie. Ek het ook glad nie slegte taal gebruik nie.”

Mnr. Kobus van der Merwe, die dorpsbestuurder, het verduidelik dat die dorp ’n bepaalde etos het.

“Pretorius het nie ooreenkomstig dié etos opgetree nie. Ons het reëls en reëls bring orde. Sy het ’n argument met haar werkgewer gehad, maar dit gaan eerder oor haar taalgebruik. Ons kan ons nie uitspreek oor wat tussen haar en haar werkgewer gebeur het nie.”

Van der Merwe het gesê dit lyk nie of Pretorius aanpas in Orania nie. “Met die keuring onderteken alle inwoners ’n onderneming dat hulle die dorp se etos sal ondersteun en daarvolgens sal lewe.”