Kaapstad. - “ ’n Mens gaan mos nie hospitaal toe om dood te gaan nie.”

Met dié woorde het me. Rose Sanqela (79), ma van die vrou wat Dinsdag in die vroeë oggendure by ’n venster van die sewende verdieping van die Somerset-hospitaal hier uitgespring het, haar ongeloof oor haar dogter, me. Xoliswa Nacanda (44), se dood uitgespreek.

Senqela soek nou antwoorde, want sy weet steeds nie wat dié dag gebeur het nie.

Volgens Senqela is Nacanda daghospitaal toe vir hoofpyn. Later het haar werkgewer haar na sý dokter gebring, waarna sy uiteindelik in die ongevalle-eenheid van die hospitaal beland het. Sy is bin­ne ’n week dood. TB-meningitis is glo by haar gediagnoseer.

“Hulle het gesê sy gaan regkom,” het Senqela gesê. “Sy was deurmekaar. Sy het slange gesien.”

Luidens die brief aan die huisdokter van haar werkgewer was sy in ’n psigotiese toestand en het sy hallusinasies gehad.

Me. Faiza Steyn, woordvoerder van die Wes-Kaapse departement van gesondheid, het gesê die Somerset-hospitaal is nie ’n psigiatriese hospitaal nie. Sulke pa­siënte word 72 uur lank waargeneem.

“Die pasiënt is gestabiliseer en het geen psigotiese neigings getoon toe sy verskuif is nie.”

Volgens me. Theresa Nacanda, suster van die oorledene, is haar suster verlede Saterdag na die Somerset-hospitaal geneem omdat haar toestand versleg het. Dinsdag is sy eers na ’n saal op die sewende vloer geneem, waarna sy glo by die venster uitgespring het.

Hospitaalowerhede noem dit selfmoord, maar die familie sê dis nalatigheid. “Waar was die verpleërs? Hoekom was daar niemand om te kyk nie?” wou Senqela weet.