Terwyl daar sprake is van ontnugterde ANC-lede wat die komende naweek sal saamtrek om hul lot te bespreek onder ’n nuwe politieke bedeling, is daar sterk aanduiding dat me. Geraldine Fraser-Moleketi, die minister van staatsdiens en administrasie, asook haar man, mnr. Jabu Moleketi, die adjunkminister van finansies, ook hul poste as parlementslede sal ontruim en sodoende hul rug geheel op die parlement keer.

Hulle was onder ’n groep senior ANC-lede wat uit hul kabinetsposte bedank het ná pres. Thabo Mbeki die afgelope naweek “teruggeroep” is uit sy presidentspos deur die ANC-grootkoppe.

Pieter du Toit en Carien du Plessis berig dat ’n plan van aksie vir die ontnugterde ANC-lede sal afhang van die nuwe kabinet wat Donderdag deur die deur die inkomende staatshoof, mnr. Kgalema Motlanthe aangewys kan word.

Intussen het Zuma-gesindes die top vyf posisies van die provinsiale leierskap in die Wes-Kaap oorgeneem, berig Sapa.

Die uitslag is Donderdagoggend bekend gemaak.

Mcebisi Skwatsha, die voormalige provinsiale sekretaris, is die nuwe provinsiale voorsitter. Die Rasool-gesinde James Ngculu het dié pos voorheen beklee.

Lynne Brown, wat onlangs as die premier van die Wes-Kaap oorgeneem is, is die nuwe ondervoorsitter.

Sipho Kroma is verkies as die sekretaris-generaal, en Max Ozinsky is herverkies tot die adjunk-sekretaris in die Wes-Kaap

Songezo Mjongile is die tesourier.