Lekkasies uit die ANC-koukus wou dit Maandag hê dat pres. Thabo Mbeki nie gaan bedank nie maar bloot ’n waarnemende president vir die volgende dertig dae sal aanstel. Dit sal luidens dié gerugte mnr. Kgalema Motlanthe, ANC-onderleier, wees.

Dit is uit vrees vir verdeeldheid in die ANC-koukus in geval van die verkiesing van ’n president deur geheime stemming in die Nasionale Vergadering. As die verdeeldheid opgelos word, kan ’n nuwe president aangewys word.

Indien nie, sal die grondwetlike bepaling van krag word dat die speaker van die Nasionale Vergadering, me. Baleka Mbete, waarneem vir 90 dae voor ’n verkiesing, wat dus laat in Januarie sal moet plaasvind.

Mnr. Jacob Zuma het Maandagmiddag omstreeks 12:30 op ’n nuuskonferensie in Johannesburg in dieselfde rigting gepraat, maar het nie bevestig dat Motlanthe wel sal waarneem nie.

“Ek is daarvan oortuig, indien hy die taak opgelê word, hy goed opgewasse sal wees daarvoor,” het Zuma gesê.

Die name van die kandidate wat oorweeg word sal in die parlement bekend gemaak word “op die geskikte tydstip”.

Zuma het voorts gesê die ANC, sowel as die parlement, sal seker maak dat die kies van ’n nuwe president so spoedig moontlik sal plaasvind.