Wildernis. - Die liggaam van ’n 63-jarige man is vier dae nadat hy die laaste keer gesien is, in sy huis genaamd Tranquility gevind.

Mnr. Withan Lloyd is Dinsdag omstreeks 14:15 met sy hande met kabelbandjies agter sy rug vasgebind, in sy spogwoning in Derde Laan gevind.

Die polisie het dié grusame vonds gemaak nadat Lloyd se bure agterdogtig geraak het. Hy is Vrydag laas gesien.

’n Buurman van Lloyd, wat anoniem wil bly, het gesê hy het onraad vermoed nadat Lloyd se bakkie geruime tyd daar geparkeer was. Hy het na Lloyd se huis gegaan. “Alles was gesluit en die plek was deurmekaar.”

Hy het die polisie ontbied en was by toe die liggaam gevind is.

“Dit was ’n baie lelike gesig. Hy het baie sleg gelyk.”

Luidens ’n polisieverklaring is daar geen wonde aan Lloyd se liggaam nie, maar misdaad word vermoed omdat dit voorkom asof die huis geplunder is. ’n Nadoodse ondersoek sal gedoen word om die oorsaak van sy dood te bepaal.

“Dit is regtig ’n groot skok vir ons. Hierdie goed gebeur nie in Wildernis nie,” het me. Hettie van der Westhuizen, ’n buurvrou, gesê. Kapt. Malcolm Pojie, ’n polisiewoordvoerder, het gesê daar was “baie lank gelede” laas ’n moord in Wildernis.

Van der Westhuizen het gesê Lloyd het sedert April permanent in Wildernis gewoon nadat hy sy steenmakery-onderneming in Port Elizabeth verkoop het. Hy het ’n dogter wat in Australië woon.

Lloyd het ook ’n vriendin, maar sy kon nie gister vir kommentaar bereik word nie.

Sy buurman het hom as ’n “stil ou” beskryf. “Jy’t nie van hom geweet nie.”

Forensiese deskundiges en polisiebeamptes was gister nog doenig by Tranquility – naby die huis van mnr. Ray Flanagan (79), wat onlangs in die Outeniekwaberge vermis geraak het, en die ontslape oudpres. PW Botha se voormalige huis De Anker.

Die eenhede vir misdaad-intelligensie en misdaad-inligtingsanalise het kragte saamgesnoer. Volgens Pojie is daar reeds inligting opgevolg en mense is al ondervra.

“In die stadium is daar niemand wat met die misdaad verbind kan word nie,” het hy gesê.

Enigiemand met inligting kan die ondersoekbeampte, speurder-insp. Klippies Theron, by 044 803 4762 te bel.

Die begrafnisreëlings is nog nie getref nie.