NURENE JASSIEM
01/09/2008 12:42:42 AM - (SA)
Kaapstad. – ’n Groep tjokka-vissers het gisteroggend die hulp van die Nasionale Seereddingsinstituut ingeroep om hulle na hul bote in die hawe by Kaap Agulhas te bring. Die see was te rof vir die vissermanne om met hul roeibote tot by hul vissersbote uit te kom.
“Ons is om 09:30 ontbied,” het mnr. Shane Kempen, bevelvoerder van die NSRI-Agulhas, gesê.
Die NSRI-Agulhas het self skade gely nadat ’n nuut geboude muur by hul basis omgewaai het.
Vrywilligers van die NSRI-Houtbaai het gister en Saterdag deur die nag gewerk om plaaslike nooddienste te help nadat bome in Constantia-rylaan omgeval het.
By Mykonos het ’n rubberboot met drie mans omgeslaan en uitgespoel. Die mans het op nabygeleë rotse geklim. Een man met ligte beserings is na ’n plaaslike hospitaal gebring, maar is later ontslaan.
