Medis 24-Afrika kantoor. - Pres. Levy Mwanawasa (59) van Zambië is gister in ’n Paryse hospitaal dood ná ’n beroerte sowat agt weke gelede in Egipte.

Mwanawasa was ’n hervormer by uitstek. Sedert sy verkiesing in 2001 het hy ’n ongenaakbare veldtog teen korrupsie in Zambië van stapel laat loop. Sy eerste teiken was ’n voorganger, mnr. Fredrick Chiluba.

As staatshoof het Mwanawasa ongekende buitelandse beleggings na sy land gelok. Hy het ook daarin geslaag om nuwe lewe te blaas in die land se inkomste uit koper deur veral die Chinese mark te betree.

Toe die nuus die oggend van 30 Junie die Afrika-unie (AU) se spitsberaad in Sjarm el-Sjeich bereik dat Mwanawasa ’n “katastrofiese beroerte” gehad het, het die AU-leiers geweet dat pres. Robert Mugabe ’n nuwe lewe gegun is.

Terwyl Mugabe homself die vorige dag, Sondag 29 Junie, inderhaas laat inhuldig het ná die chaotiese eenmanverkiesing van twee dae tevore, was Mwanawasa hard aan die werk om te verseker dat Mugabe ’n vyandige ontvangs op die AU-beraad op die Egiptiese kusdorp te beurt val.

Verskeie AU-staatshoofde – onder wie die presidente van Tanzanië, Botswana, Nigerië, Rwanda, Ghana, Senegal, Liberië, Kenia en Uganda – was bereid om Mwanawasa te volg in die skerpste veroordeling tot nog toe van ’n AU-leier.

Die nuus van Mwanawasa se beroerte was egter een te veel vir die groep wat bereid was om agter hom te staan.

Slegs Botswana en Nigerië, teenoor die stilswye van die res, het voortgegaan met hul eis dat Mugabe uit alle AU-forums geskors word.

Die uiteinde was dat Mbeki daarin geslaag het om ’n resolusie deurgevoer te kry wat hom en Mugabe in staat gestel het om tyd te koop om ’n steeds ontwykende skikking oor ’n regering van nasionale eenheid na te streef.