Port Elizabeth. – Die polisie is op soek na enige inligting in verband met die moord op ’n 62-jarige tuinier wat gisteroggend dood in sy bed gevind is.

Volgens insp. Gerda Swart, ’n polisiewoordvoerder, het die man in die motorhuis van ’n 84-jarige vrou in Duiker Place, St. Francisbaai, gebly.

Hy het soms in haar tuin gewerk.

“Die vrou se versorger het Maandagaand soos gewoonlik die man se aandete vir hom geneem. Toe die versorger gisteroggend by hom gaan inloer, het sy op die man se lyk afgekom,” het Swart gesê.

“Die man is vermoedelik met sy skoenveters verwurg.”

Die polisie ondersoek ’n saak van moord. Enigiemand met inligting word gevra om insp. Pieter Bessinger, die ondersoekbeamp­te, by 042 200 4900 te bel.

Die man se naam kan nog nie bekend gemaak word nie omdat sy naasbestaandes nog nie bereik kon word nie. – Bobbi Scheckle