Johan Prinsloo, uitvoerende hoof van die Suid-Afrikaanse Rugbyunie (Saru), word nou ook daarvan beskuldig dat hy diegene viktimiseer wat teen hom in ’n interne ondersoek na seksuele teistering getuig het.

Prinsloo is in 2005 ná ’n interne ondersoek deur SA Rugby onskuldig bevind, maar daar word nou beweer dat daar ­ongerymdhede in dié ondersoek was.

Die klaer, Lindsay Williams, het hom sedertdien tot die Kaapse hooggeregshof gewend met die saak waarin hy R400 000 van Prinsloo en SA Rugby, as die tweede verweerder, eis.

Williams beweer dat Prinsloo hom tussen Oktober 2004 en Augustus 2005 in sy kantoor in Nuweland, Kaapstad, seksueel geteister het.

Daar word nou binne Saru beweer die destydse ondersoek is “toegesmeer” om Prinsloo te beskerm. Die dienste van die regsfirma wat aanvanklik die saak ­behartig het, is glo opgeskort toe SA Rugby se werknemers teen Prinsloo getuig het.

Mark Alexander, Saru se waarnemende president in die afwesigheid van Oregan Hoskins, sê hy is onbewus van die aantygings dat daar teen sekere personeellede gediskrimineer word.

“Dit is die eerste keer dat ek daarvan hoor. Dit is ’n ernstige aantyging en Saru sal agter die kap van die byl moet kom.

“Die feit dat ons die tweede verweerder is, stel ons in ’n swak lig. Ons gaan aanvra dat die verslag wat by die hof ingedien is, aan ons beskikbaar gestel word.

“Ons mag hom dalk vra om verlof te neem terwyl die saak sy koers loop. ­Sover ek weet, is daar nog nie op ’n datum besluit wanneer die saak aangehoor sal word nie,” sê Alexander.

Volgens hom sal Saru weer intern na die saak kyk. “Ons sal beslis na die saak moet kyk wanneer die president uit Australasië terugkeer.”

Prinsloo was gister nie vir kommentaar beskikbaar nie, maar dit wil al hoe meer lyk asof sy termyn by Saru vanjaar tot ’n einde gaan kom.

Saru is juis besig met grootskaalse herstrukturering en het reeds besluit om sy beroepsarm, SA Rugby (Edms.) Bpk., tot niet te maak.

In die nuwe bestel sal daar net vir ’n uitvoerende hoof of besturende direkteur plek wees en nie vir albei, soos op die oomblik die geval is, nie.