WELLINGTON (Nieu-Seeland). – “As ek die insident ten volle gesien het, sou ek ’n geel kaart gegee het.”

Só het die Australiese skeidsregter Stuart Dickinson gister gereageer op ’n ­navraag van Die Burger oor die voorval waarin die All Black-slot Brad Thorn in ­Saterdag se Drienasies-rugby­toets ’n laat boorvat op die Springbok-kaptein, John Smit, uitgevoer het.

Dit het in die sesde minuut gebeur nadat Dickinson sy fluitjie geblaas het vir ’n gevaarlike duikslag deur die All Black-flank Adam Thomson op die Bok-heelagter, Conrad Jantjes.

Smit se lies is beseer en hy moes die veld in die 38ste minuut verlaat.

Dit is onwaarskynlik dat hy betyds fiks sal wees vir die tweede toets Saterdag teen die All Blacks op Carisbrook in Dunedin.

Thorn is uitgewys en gister in ’n tugverhoor aan onsportiewe gedrag skuldig bevind. Hy is vir een wedstryd geskors.

Nóg Dickinson nóg sy grensregter het egter die insident ten volle gesien, en daarom het hulle Thorn nie van die veld gestuur nie.

Nietemin was dit ’n belangrike oomblik in die wedstryd, want die All Blacks het vroeg hul stemme veral voorlangs dik gemaak. Dit is onwaarskynlik dat hulle dieselfde tipe momentum sou kon kry as Thorn tien minute in die koelkas was.

“Ek het na links gekyk om ’n speler op te tel vir die hoogvat.

“Net toe ek na regs kyk, was John Smit in die lug. Ek het nie gesien hoe hy geland het nie,” het Dickinson gesê.

“Die grensregter se sig is ook deur spelers se liggame geblok. Hy het hom sien opgaan en afkom, maar nie sien land nie. Ek het nou die kykweer gesien en sou ’n geel kaart gegee het indien ek als gesien het.”

Dickinson het erken hy het ’n fout gemaak deur in die 58ste minuut nie aan Nieu-Seeland ’n drie toe te ken nie.

Dit het gelyk of die All Blacks se agtsteman, Jerome Kaino, sy tweede drie gedruk het ná ’n skitterende skoppie deur die losskakel, Dan Carter. Dickinson het beslis dat Kaino voor die skopper en dus onkant was.

“Die onkantroep was myne en verkeerd,” het Dickinson gesê.