Sneeu is ons voorland! En gepaard daarmee nóg reënbuie oor die hele Wes-Kaap heen. Sterk reën word ook vir die res van die land voorspel.

Dan is daar boonop die vooruitsig dat die koue krane wat met die Suidpool verbind is, steeds wawyd oop is.

Die sinoptiese kaart wys vandag dat die koue lug steeds noord mik en teenoor die Richtersveld binneland toe swaai.

Dit is ’n baie wye draai – wat die wolke teen môre swaar genoeg maak om sneeu oor die Noord-Kaap, Klein-Karoo en die Grabouw-berge te laat val. Woensdag loop Worcester en Oudtshoorn ook onder die sneeu deur.

En om alles te kroon, hang die twee hoogdrukselle daar rond asof iemand hulle vergeet het.

Die sinoptiese prentjie is vandag dalk vir baie mense nie mooi nie, maar dit is vir landbouers beslis die beste nuus in jare. Suid van die Oranje praat boere van die eerste normale winter in jare. Een oupa sê ons moet ’n goeie winter hê, want dan word al die peste en plae gratis, vry en verniet uitgeroei.

Sê dankie vir die weer, want ’n vrugbare somer is voor die deur.

Wat is die amptelike stand? Weerhaan se sonkaart wys dit is vandag oor presies ’n maand lente. En dit is amptelik. Die modebase sit reeds oorgehaal om hul somerrokkies te adverteer.

Dit is verwarrend, sê skipper Piet Kortman, van Kalkbaai, want vir hom is dit winter as dit drie dae aanmekaar reën. Nog nie gesien dit reën ’n hele week aaneen nie.

Die weerkantoor kan te midde van al die tekens nie anders nie as om sy waarskuwing van vloede en bittere koue te herhaal.

Slegte nuus vir die dakloses!