Die druk op die Kaapse 2010-span en ander organiseerders van die Wêreldbeker-sokkertoernooi in 2010 neem by die dag toe.

Nie alleen stel die huidige ekonomiese situasie al hoe groter eise om infrastruktuur-projekte binne begrotings te hou nie, maar bedrysplanne moet nou opgestel en getoets word.

In die proses is daar moontlike scenario’s wat die organiseerders snags laat rondrol, volgens mnr. Pieter Cronjé, Kaapse 2010-woordvoerder, en mnr. Al-Ameen Kafaar, woordvoerder van die Wes-Kaapse departement van vervoer en openbare werke.

Hulle wil nie spesifieke voorbeelde noem nie, maar gee toe dat vir enigiets voorberei moet word, ook vir die volgende:

Stel jou voor Amerika en ’n Afrikaland dring deur tot ’n halfeindstryd in die Groenpunt-stadion – en pres. Barack Obama wil die wedstryd bywoon. ’n Dag voor die wedstryd land Airforce One, vergesel van drie vragvliegtuie vol veiligheidspersoneel en voertuie, in Kaapstad.

Derduisende Suid-Afrikaners en ander ondersteuners uit Afrika sak op die stad toe en die Amerikaners dring aan op toepaslike verblyf-, veiligheids-, vervoer- en ander logistieke reëlings.

Dit kan in ’n nagmerrie ontaard, maar elke moontlikheid moet in ag geneem word, sê hulle. Intussen bestaan die moontlikheid dat die Duitse span met 50 000 ondersteuners in 2010 sy basiskamp in ’n gholfoord by Kleinmond wil vestig, terwyl die Engelse span en sy ondersteuners by Knysna wil bly. Dink net aan die druk op die geriewe en dienste van dié twee plekke, sê Kafaar.