Kaapstad. - Mnr. Jacob Zuma se voorstel dat leerders dalk “weer” moet leer bid so tussendeur die leer, is deur kerkleiers verwelkom.

Die president van die ANC het vandeesweek in Polokwane voor sowat 500 godsdiensleiers die vraag geopper of daar nie meer gebid behoort te word in skole nie.

Dr. Gustav Claassen, die NG Kerk se woordvoerder oor onderwys, het dié sentiment verwelkom. Volgens hom skep die nuwe Skolewet in der waarheid groot ruimte vir godsdiensuiting, maar nog nie baie skole het die bal gevat en daarmee gehardloop nie.

“Mense is dalk nog té sensitief en het nog nie van al die geleenthede (in terme van godsdiensbeoefening) gebruik gemaak nie,” aldus Claassen.

Dr. Vuyani Vellem, adjunk-sekretaris-generaal van die Suid-Afrikaanse Raad van Kerke, het ook positief gereageer op Zuma se uitlating wat hy op retoriese wyse aan die groep predikers gestel het: “Hoe onderrig ons godsdienstige waardes? Bid ons weer voor skool soos wat ons altyd gedoen het?” wou Zuma weet.

“Ek glo die kerk het ’n rol om te speel in die onderwys, en ’n ernstige een daarby,” het hy gesê. “Onderwys is voorheen gebruik deur die onderdrukkers as ’n instrument om ons te onderdruk. Ek sê die onderwys moet gebruik word as ’n stuk gereedskap om ons mense te bevry.”

’n Woordvoerder van die departement van onderwys, mnr. Lunga Ngqengelele, het gesê dinge soos gebedsgeleenthede by skole hang in ’n groot mate van die betrokke skole en gemeenskappe af.

Volgens hom mag daar egter nie druk geplaas word op leerders wat nie daaraan wil meedoen nie.