KAAPSTAD. – Politieke partye het met verbasing gereageer op die nuus dat die omstrede Kaap­se regter-president, regter John Hlophe, deur die konstitusionele hof van onbehoorlike inmenging aangekla is.

Me. Helen Zille, DA-leier, het in ’n verklaring gesê die feit dat Hlophe probeer het om invloed uit te oefen in die uitsprake van hofsake waarby mnr. Jacob Zuma, ANC-leier, betrokke is, ruk die fondamente van Suid-Afrika se grondwetlike demokrasie.

Haar party sal geen steen onaangeraak laat om agter die kap van die byl te kom nie.

“Gegewe die erns van die klag sal die DA seker maak al die moontlike word gedoen sodat die aantygings deeglik en spoedig deur die Regterlike Dienskommissie (RDK), waarvan die DA se me. Sheila Camerer lid is, ondersoek word.

“As in die ondersoek bevind word Hlophe het sy amp misbruik, moet hy af­gedank en vervolg word,” het Zille gesê.

Die klag skep die moontlikheid dat die voorval een van Zuma se talle pogings kan wees om die reg te ontduik en dat Hlophe se optrede namens die ANC-leier kan wees, meen die DA-leier.

’n Ontstoke mnr. Koos van der Merwe, IVP-LP en woordvoerder oor justisie, sê die publiek het die volste reg om te weet wat die presiese aard van die klag teen Hlophe is. Hy het onlangs ’n regsmening aan hoofregter Pius Langa gestuur waarin gesê word klagtes teen regters moet in belang van deursigtigheid en die publiek se reg om te weet, openbaar gemaak word. Die RDK maak besonderhede van klagtes nie bekend nie.

“Die vorige keer toe Hlophe in omstredenheid gedompel was en klagtes teen hom ingedien is, is besonderhede daaroor ook nie bekend gemaak nie. Hierdie keer moet die klagtes uitkom.”

Me. Patricia de Lille, leier van die OD, het gesê die ondersoek moet sy gang gaan voordat uitsprake oor Hlophe gemaak kan word.

“In hierdie stadium weet ons nie hoe hy die sake teen Zuma probeer beïnvloed het nie. Dit is egter ’n baie ernstige klag teen hom.”

Die leier van die UDM, mnr. Bantu Holomisa, het hom by De Lille aangesluit en gesê die ondersoek na Hlophe moet so gou moontlik afgehandel word.

“Dit is egter duidelik die smerige binnegevegte in die ANC is besig om na die land se demokratiese instellings oor te spoel, soos wat reeds die geval met ons intelligensiedienste is.”

Me. Jessie Duarte, die ANC se hoofwoordvoerder, wou niks oor die saak sê nie: “Ons skiet nie van die heup af nie.”