WASHINGTON. – Pres. Thabo Mbeki het ’n brief van vier bladsye aan pres. George W. Bush gerig waarin hy dit duidelik stel Amerika “moet sy neus uithou (uit Afrika), dat Afrika aan hom behoort”.

Mbeki kritiseer Amerika in die brief “vol uitroeptekens” omdat hy kant kies teen pres. Robert Mugabe se regering en nie die menings van die mense van Zimbabwe re­spekteer nie.

Die brief is deur mnr. Michael Gerson, Bush se voormalige hoof-toespraakskrywer en beleidsadviseur, in sy rubriek in The Washington Post onthul. Hy haal anonieme Amerikaanse amptenare aan wat onder meer sê: “Mbeki het kop verloor, dit was verregaande.”

Die brief is einde April aan die Withuis gerig en volgens een amptenaar het Mbeki dit duidelik gestel Zimbabwe “is nie ons besigheid nie en ons moet ons neus (uit Afrika) hou, dat Afrika aan hom behoort”.

In die rubriek getiteld “The Despots’ Democracy” word aangedui hoe Suid-Afrika ’n bespreking oor die menseregtevergrype in Zimbabwe in die VN gesmoor het, asook in Wit-Rusland, Kuba, Noord-Korea en Oezbekistan.

Suid-Afrika was ook die enigste ware demokrasie wat gestem het teen ’n resolusie om te eis dat die Birmaanse junta die etniese suiwering stop en me. Aoeng San Soe Kji vrylaat.

Die Withuis het gister by navraag aangedui hy sal later op die brief reageer. Luidens berigte sal Bush wel Mbeki se brief beantwoord. Die Suid-Afrikaanse ambassade in Washington DC was by navraag ook nie bewus van die brief nie, maar sal ook later reageer.

Gerson sluit sy rubriek af met die stelling dat die debat oor Suid-Afrika se rol in Zimbabwe die volgende vraag dwarsdeur Suider-Afrika uitklaar: Het revolusionêre partye in die streek geveg vir bevryding of vir vryheid? As dit net was vir die bevryding van Westerse imperialisme, dan het bejaarde despote van onderdrukkende regerende partye ’n aanspraak op die mag.

“Maar as dit vir vryheid was, dan moet diegene wat vir vryheid in Zimbabwe gewerk het, ook hul aandeel kry. Sover het Suid-Afrika – van alle plekke – kant gekies vir die despote.”

Die rubriek het hewige kommentaar op The Washington Post se webtuiste ontlok. ’n Suid-Afrikaner met die skuilnaam Juan2 skryf: “Haai. Ek is ’n Suid-Afrikaner en ek kan julle vertel dat bitter min Suid-Afrikaners Mbeki se sienings deel. Gelukkig is hy nie meer lank die president nie. Hy is waarlik ’n siek, siek, siek, siek mens. Siek!”
. Mbeki het ondanks kwaai kritiek op sy oënskynlike verwydering van probleme aan die tuisfront gister die steun van sy kabinetslede gekry, berig Pieter du Toit.

Dit volg op oproepe van oor die politieke spektrum heen, inlsuitend sy eie party en alliansiegeledere, dat hy sy kantoor moet ontruim omdat hy uit voeling is met wat in die land aangaan.

Mnr. Themba Maseko, regeringswoordvoerder, het hier gesê Mbeki se ministers staan bankvas agter hom. Volgens hom is dit nie waar dat hulle vertroue in Mbeki verloor het nie en is die kabinet nog net so vasbeslote en gemotiveer as toe hulle hul dienstermyn begin het.