KAAPSTAD. – Parlementslede wat reiskoepon-bedrog gepleeg het, moet steeds vir hul sondes betaal ten spyte van ’n kennisgewing in die Staatskoerant wat voorstel dat likwidasie-stappe teen hulle gestaak word.

Die Skerpioene het ook steeds die reg om LP’s strafregtelik in die saak aan te kla.

Resolusies is in die Staatskoerant van 9 Mei gepubliseer waaroor die krediteurs van die reisagentskap Bathong Travel volgende Vrydag op ’n vergadering moet besluit. Bathong is ook by die reiskoepon-skandaal betrek.

Hierdie resolusies lui onder meer dat die likwidateurs nie verdere stappe teen die LP’s moet doen nie met betrekking tot kaartjies, heffings en/of ander dienste waarvoor geen kwitansies bestaan nie.

Likwidateurs moet alle ander litigasie teen parlementslede staak oor koepons wat deur Bathong, sy direkteurs of aandeelhouers gebruik is.

Die parlement skeld ook die likwidateurs vry met betrekking tot enige verdere koste wat uit hierdie resolusie mag voortvloei.

Die parlement het volgens alle aanduidings gehoop om skuld van nog ten minste R6 miljoen te in.

Mnr. Tlali Tlali, woordvoerder van die Skerpioene, wat binnekort ontbind gaan word, het gister gesê die kennisgewing beteken nie dat die Skerpioene verdagte LP’s nie meer mag aankla nie.

“Ons sal die LP’s aankla wat ons aankla, maar as dit so gebeur dat daar nog van hulle is in die toekoms, dan sal ons hulle ook aankla.”

Hy wou nie sê hoeveel LP’s nog aangekla moet word nie.

Altesame 30 LP’s is reeds skuldig bevind aan reisbedrog en het ingevolge pleitooreenkomste hul skuld en boetes in die saak begin terugbetaal.

Een LP, mnr. Mnyami Booi, van die ANC, se saak dien steeds voor die Kaapse streekhof. Dit is vroeër vandeesweek tot September uitgestel.

Booi is die enigste LP wat nie ’n pleitooreenkoms met die staat aan­gegaan het nie.

Mnr. Jannie van Vuuren, aanklaer in die Travelgate-strafsaak, het gesê die kennisgewing sal nie hierdie strafsaak raak nie.

Dit behoort nie die terugbetaling van skuld en boetes te raak wat nog gedoen moet word nie, aangesien hierdie terugbetalings kragtens ’n hofbevel geskied.

Sover sy kennis strek, het die LP’s reeds hul skuld met die likwidateurs vereffen.

Bathong Travel is nog die enigste reisagentskap wat uitstaande sake het.

Mnr. Luzuko Jacobs, hoof van die parlementêre kommunikasiediens, het gister gesê die kennisgewing is slegs ’n mosie waaroor eers volgende week besluit gaan word.

Mnr. Berhard Kurz, die regsverteenwoordiger vir die likwidateurs, wou nie gister kommentaar lewer nie.