KAAPSTAD. – Die polisie het in die afgelope vyf jaar beslag gelê op dwelms ter waarde van R111 miljoen wat net soveel as 22 eenton-bakkies weeg.

Só het die provinsiale minister van gemeenskapsveiligheid, mnr. Leonard Ramatlakane, gister gesê toe hy sy begrotingstoespraak vir die nuwe boekjaar gelewer het.

Hy was besonder optimisties oor die ­vordering wat die laaste ruk met ­dwelm­bestryding in die Wes-Kaap behaal is.

“Ons tree op teen dwelmbase wat soveel leerders op die Kaapse Vlakte se toekoms verwoes.”

Volgens Ramatlakane, wat gemeenskapsveiligheid die afgelope vyf jaar as sy portefeulje het, het hy ’n departement by die DA oorgeneem wat hom skuldig gemaak het aan ’n “gekibbel” terwyl bendes en misdadigers die Wes-Kaapse gemeenskap “as gyselaar” gehou het.

“Vandag is daar ’n volgehoue afname in misdaad – onder meer vanweë die vennootskappe wat ons met die gemeenskap opgebou het.”

Die departement het ’n begroting van R228 miljoen vir die boekjaar 2008-’09 ontvang. Nuwe inisiatiewe wat hieruit ge­finansier sal word, sluit in:
. Die werwing van 750 vrywilligers vir die verbetering van veiligheid by 165 hoë­risiko-skole;
. Sowat 1 600 nuwe polisielede en reserviste; en
. Die ontplooiing van 450 vrywilligers by stasieplatforms in die provinsie.

Me. Zodwa Magwaza, ANC-LPP en voorsitter van die staande komitee oor gemeenskapsveiligheid, het gesê daar was die afgelope tyd ’n groot verbetering in die departement van gemeenskapsveiligheid se werkverrigting, maar sy is tog bekommerd oor die positiewe statistieke wat ontvang word. “Ons moet liewer ’n behoorlike maatstaf hê voordat ons sonder meer sê misdaad neem af.”

Mnr. Lennit Max, DA-LPP, het gesê Ramatlakane se departement is glad nie op peil nie. Die departement, wat tans deur die Wes-Kaapse ouditeur-generaal ondersoek word, het twee jaar agtereenvolgens ’n gekwalifiseerde ouditverslag gekry. “En ek is seker dit sal vanjaar ook die geval wees.”

Mnr. Mzwandile Manjiya, LPP vir die United Independent Front (UIF), was selfs minder taktvol. “Dank Vader dié minister se termyn verstryk volgende jaar.” Hy het bygevoeg die misdaad in die provinsie toon ’n heel ander prentjie as die positiewe statistieke waarmee Ramatlakane in sy begrotingstoespraak spog.