Die Burger | Nuus | Ekspo bied groot leerervaring

PAARL. – Dit was amper of ’n hele paar leerders het gister op die Museum-en-erfenis-ekspo in die Paarl Mall (krokodil)trane gestort.

Die twee krokodille wat deel van die Le Bonheur-krokodilplaas se uitstalling uitgemaak het, het telkens leerders die skrik op die lyf gejaag.

Die meeste van die leerders was te bang om aan hulle te vat of selfs naby die klein krokodille se hok te kom.

Jacques April (12) was egter een van die dapper leerders van die Primêre Skool Bergendal wat die kans aangegryp het om aan Charlie (1) te vat.

Terwyl Steve (ses maande) in die hok rondgekriewel het, het Jacques Charlie versigtig vasgehou.

“Dit was ’n bietjie grillerig, maar dit was vreeslik lekker,” het hy daarna gesê.

Een vir een het Jacques se vriende dit gewaag om aan die krokodilletjie te vat, maar die meeste het heel verskrik en met groot oë weggespring.

“Hulle is almal ’n klomp bangbroeke,” het een van die plaas se toergidse, mnr. Milner Sybok, gespot.

“As daai ding spring, spring hulle ook.”

Me. Isabeau Botha, kommunikasiebestuurder van die Afrikaanse Taalmuseum en -monument en een van die ekspo-organiseerders, het gesê die ekspo het gister reeds baie besoekers gehad.

Gister het die Primêre Skole JJ Rhode, Wes-Eind, Bergendal, Alfons en Dal Josaphat die ekspo besoek.

Vandag is dit die NGK Primêre Skool Boplaas van Hermon en die Primêre Skool Ikaya van Khayamandi se beurt.

Sestig leerders van elke skool is vervoer met busse wat deur die Drakenstein-munisipaliteit en Kaapse Wynland-distriksmunisipaliteit as deel van die Borg ’n Bus-projek geborg is.

Die Franschhoek Motormuseum, die Paarl Museum en die Afrikaanse Taalmuseum is van die 25 instellings wat daar uitstal. Dié ekspo, wat deel is van internasionale museummaand, duur tot 18 Mei.


	NUUS		OOS-KAAP		SUID-KAAP		BUITELAND		KAMPVEGTER


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|