’n Vervalste doktersbrief het daartoe gelei dat ’n werknemer van bedrog aangekla is en ’n man wat na bewering dié briewe verkoop, in hegtenis geneem is.

Die swendelary het aan die lig gekom toe ’n bestuurder werksaam by Avis in Kemptonpark besluit het om al die doktersbriewe wat op 28 en 29 April ingehandig is, te ondersoek.

Volgens konst. Zenzile Murudi, ’n polisiewoordvoerder, het die bestuurder al die dokters gekontak, en kon almal behalwe een bevestig dat hulle ’n brief uitgereik het.

Dié dokter het gesê sy handtekening is nagemaak en dat hy wit papier, en nie blou papier nie, gebruik.

Die polisie het die werknemer ondervra en hy het gesê hy het die doktersbrief by ’n man in Daveyton gekoop.

In ’n klandestiene operasie het ’n polisieman dié persoon gebel en ’n doktersbrief teen ’n koste van R30 bestel.

Beide die werknemers en die verskawwer van die briewe is in hegtenis geneem en sou Maandag in die hof verskyn het.

Volgens die dokter het hy al verskeie navrae ontvang oor “sy” siekbriewe. Die polisie ondersoek die moontlikheid dat daar ’n verband is tussen die man wat in hegtenis geneem is en ’n voormalige werknemer in die dokter se kantoor.