Die staat het Maandag in die Kaapse hooggeregshof sy saak gesluit in die Taliep Petersen-moordsaak, berig Carryn-Ann Nel.

Adv. Klaus von Lieres und Wilkau SC, vir mev. Najwa Petersen, een van die beskuldigdes in die moord, het daarna die hof vir ’n week uitstel gevra om deur die getuienis van staatsgetuies wat nie deur die staat geroep is nie, te gaan.

Vroeër vanoggend het ’n deskundige getuig oor waar die vier beskuldigdes (mev. Petersen, mnre. Abdoer Emjedi, Waheed Hassen en Jefferson Snyders) hulself bevind het vanaf 13 Desember tot ná Taliep se moord op 16 Desember 2006.

Mnr. Peter Schmitz kon dié gevolgtrekkings maak deur selfoonontledings van al die beskuldigdes.

Die saak is tot Dinsdag 20 Mei uitgestel.