Die Krugerwildtuin is ’n knelpunt vir wilddiefstal.

’n Onlangse parlementêre vraag aan die minister van omgewingsake en toerisme het onthul sowat 250 soogdiere in dié wildtuin is in die laaste vier jaar deur wilddiewe afgemaai. Daaronder was minstens 44 witrenosters en 31 buffels.

Só het mnr. Gareth Morgan, DA-woordvoerder oor omgewingsake, gister in ’n verklaring gesê.

Syfers dui daarop dat die Krugerwildtuin die park is wat die meeste van alle Suid-Afrikaanse Nasionale Parke (Sanparke) deur wilddiewe geteiken word.

In statistiek wat deur die minister van omgewinsake en toerisme vrygestel is, is 55 soogdiere verlede jaar in dié park doodgemaak, teenoor 91 in 2006, 78 in 2005 en 23 in 2004.

“Terwyl daar beslis minder soogdiere in 2007 doodgemaak is as in vorige jare, bly dié syfers gevaarlik hoog, veral wat die witrenoster betref,” het Morgan gesê.

Dié getalle kan selfs hoër wees as in ag geneem word hoe moeilik dit is om statistiek vir wilddiefstal saam te stel.

“Aan die een kant kan die Kruger-syfers baie hoër wees omdat wildbewaarders slegs dié syfers kan bereken wanneer daar duidelike bewys is dat ’n dier onwettig doodgemaak is. ’n Mens kan aanneem daar is ’n hele klomp ander diere wat net spoorloos verdwyn.”

Mnr. Raymond Travers, woordvoerder van die Krugerwildtuin, het bevestig hulle het in die laaste vier jaar ’n toename in veral renosterslagtings gehad.

Dít is hoofsaaklik weens ’n toenemende aanvraag na renosterhorings in die buiteland.

Volgens Travers het Sanparke verskeie stelsels in plek wat wilddiefstal probeer bekamp. Dit sluit in wildbewaarders wat daagliks die terrein te voet, per fiets of per motor patrolleer, ’n intelligensie-eenheid en helikopters wat ook gereeld die gebied patrolleer.

“Ons probeer alles in ons vermoë om wilddiefstal te bekamp. Een dier wat só doodgemaak word, is een te veel,” het Travers gesê.