KAAPSTAD. – Suid-Afrikaners is honger vir verandering – veral ná Polokwane.

In haar weeklikse nuusbrief, SA Today, sê die DA-leier, me. Helen Zille, sy het in haar eerste jaar as leier van die opposisie besef daar is ’n groot behoefte by mense van alle vlakke van die samelewing dat die politiek ’n nuwe rigting moet inslaan.

Zille het verlede week haar eerste jaar as DA-leier gevier en, anders as dr. Alex Boraine, ondervoorsitter van die Waarheid-en-versoeningskommissie, meen sy dat ’n rigtingverandering in die politiek op plaaslike regeringsvlak aangedryf moet word.

In Boraine se outobiografie, A life in transition, wat onlangs verskyn het, voer hy aan dat verandering slegs deur ’n ANC-lid van mnr. Cyril Ramaphosa se statuur gelei kan word – iemand wat dus in staat sal wees om ’n groot genoeg swart ondersteuningsbasis te bewerkstellig.

Die teendeel is waar, sê Zille. “Die verandering in Suid-Afrikaanse politiek begin nie van bo af by die parlement nie, maar by die plaaslike regering.”

In die stad Kaapstad, sê Zille, het ses opposisiepartye bymekaargekom en ’n veelpartyregering tot stand gebring. Dié regering het, teen alle verwagting in, staande gebly.

Volgens haar is die veelpartyregering besig om ’n fondament te lê van gedeelde waardes waar etniese, rasse- en godsdiensverskille te bowe gekom word en wat ’n lewensvatbare alternatief vir die ANC se magsbasis bied.

“Die ANC weet hierdie ‘alternatief’ het die potensiaal om oor die hele land pos te vat,” sê Zille. Dít sal die weg baan vir ’n swart politieke leier om die leisels oor te neem, maar dit sal nie onmiddellik gebeur nie – daarvoor is die politieke prys te duur.

As sy, soos Boraine beweer, ’n ­belangrike rol te speel het om ­politieke verandering in die land ­teweeg te bring, moet sy die ­burgemeester van Kaapstad bly, sê Zille.

“Plaaslike regeringsvlak is die beste platform waarvolgens politieke rigtingverandering in die land kan plaasvind en dáár kan ek die grootste bydrae lewer.”

Die stad Kaapstad se model van ’n veelpartyregering kan met sukses in talle ander plaaslike regerings in die land in werking gestel word, sê Zille.