Tweefontein. – ’n Vermeende rower is in Tweefontein, Mpumalanga, dood en nog twee ernstig beseer toe woedende gemeenskapslede hulle toegetakel het. Dít nadat die mans glo ’n steenkoolverkoper gewond en beroof het.

Supt. Abie Khoabane, polisiewoordvoerder, het gister gesê die drie rowers het die steenkoolverkoper Woensdag in Tweefontein aangehou.

“Die man is van R2 500 beroof en toe in die arm geskiet,” het Khoabane gesê.

“Lede van die gemeenskap het die skoot gehoor en die mans agternagesit.”

Die woedende gemeenskapslede het die drie mans glo gevang en geslaan. Een van die rowers is dood en nog twee word met ernstige beserings in die hospitaal behandel. “Ons waardeer dit dat die gemeenskap ons help met misdaadbestryding, maar veroordeel dit dat hulle eie reg gebruik en hulle tot geweld wend,” het Khoabane gesê. – Sapa