Die ou gesegde dat kinders gesien, maar nie gehoor moet word nie, geld beslis nie as dit by besluite oor gesinsaankope kom nie.

’n Nuwe peiling van Unisa se Buro vir Marknavorsing wys dat tieners ’n deurslaggewende sê het in die aankope van 25 uit 34 produkte wat vir die navorsing gekies is. Dié invloed behels die besteding van R380 miljard aan produkte soos wegneemetes, die bywoning van konserte, watter flieks die gesin kies en waar hulle vakansie hou.

Prof. Deon Tustin, hoof van die gedrag- en-kommunikasie-afdeling van die buro, sê die navorsing wys duidelik wat die voorkeure en invloed van die “toekomstige verbruiker” is. Bemarkings- en advertensiemaatskappye moet ag slaan op dié groep se beduidende sê in hul ouers se bestedingspatrone, sê Tustin.

Hulle het self ook ’n prominente verbruikerstempel met besteding van R7 miljard danksy sakgeld van pappie en mammie. Tustin se navorsing wys dat die sakgeld wat kinders ontvang, gemiddeld R320 per maand beloop.

Swart kinders kry gemiddeld R210 per maand, Indiërs R285, bruin kinders R220 en wit kinders R485.

“Daar is natuurlik gesinne waar die kinders R3 000 per maand sakgeld kry.”

Die navorsing is gedoen onder 750 huishoudings in die middel- en hoër-inkomstegroep in Johannesburg, Pretoria, Durban, Kaapstad en Port Elizabeth.

Tustin sê ouers is uitgevra oor die invloed wat hul kinders tussen die ouderdom van 13 en 18 jaar uitoefen op die besluite oor die gesin se aankope.

“Daar is sowat 1,7 miljoen kinders in dié ouderdomsgroep in die bevolking. Ons het hulle gekies vir die navorsing omdat hulle kognitief verder gevorder is.”

In die peiling is bevind dat wit en swart tieners ’n groter invloed het by die koop van wegneemetes of waar die gesin gaan vakansie hou. Hulle wil gewoonlik see toe, en dan ook na spesifieke plekke omdat hulle weet daar is vermaak, want hulle kan hulself nie meer vermaak nie.

Bruin tieners het weer ’n groter invloed op die aankoop van kos en klere en Indiër-tieners oor die aankoop van inligtingstegnologie. – Sake24