KAAPSTAD. – Die heffing van tolgeld op die N1 en N2 binne die Kaapse metropool sal planne vir beter openbare vervoer in die wiele ry.

Dit gaan ook die armes wat dikwels ver van hul werk af woon, die swaarste tref, volgens omgekrapte lede van die Kaapse stadsraad.

Hulle is só ontsteld oor die voorgestelde tolhekke en -heffings op die twee hooftoegangsweë na die kern van die metropool dat die raad se portefeuljekomitee oor vervoer, paaie en stormwater nou ’n buitengewone werksessie oor die saak gaan hou.

Intussen werk senior amptenare van verskeie munisipale departemente aan ’n verklaring. Dít sal namens die burgemeester, me. Helen Zille, aan die SA Nasionale Padagentskap gestuur word as die raad se kommentaar op die tolplanne, het mnr. Eddie Chinnappen, hoof van vervoer, paaie en stormwater, bekend gemaak.

Hy het ook onderneem om ’n konsep van die verklaring spoedig aan die lede van die portefeuljekomitee beskikbaar te stel sodat hulle dit op die werksessie kan bespreek.

Mnr. Taki Amira, van die DA, het gesê groot getalle pendelaars moet dié twee paaie daagliks gebruik omdat daar nie behoorlike openbare vervoer is nie.

Dit geld ook diegene wat uit die Helderberg-gebied na die middestad moet kom om hier werk te soek.

Die tolpaaie sal net ’n groter las plaas op mense wat reeds swaarkry. Hy wil dus weet of die tolplanne aan die stad opgedwing gaan word, het Amira gesê.

Mnr. Xolani Sotashe, van die ANC, het gesê hy voel ook sterk oor die kwessie, maar sal sy standpunt later stel.

Me. Danetta Smit, van die DA, het bygevoeg dat die bekostigbare snelbusdienste wat vir die openbare vervoernetwerk beplan word, ook negatief getref sal word. Koste- en tydbesparings sal volgens haar deur die tolgeld en -hekke ongedaan gemaak word.

Me. Elizabeth Thompson, burgemeesterskomiteelid vir vervoer, paaie en stormwater, het gesê sy beoog om teen die naweek die munisipale departement se standpunt oor die saak oor te dra.

Volgens Chinnappen het die publiek nog tot einde vandeesmaand kans om op die voorgestelde tolplan kommentaar te lewer.