PRETORIA. – Kurt Darren is die enigste Afrikaanse kunstenaar wat genooi is om op 27 Junie vanjaar in Hyde Park, Londen, op te tree ter viering van oudpres. Nelson Mandela se 90ste verjaardag.

“Dit is die hoogtepunt van my loopbaan en ’n reusevoorreg,” het dié sanger, wat onlangs met die Sama-toekenning in die afdeling beste Afrikaanse sokkiedans-album bekroon is, gesê.

“Ek is trots daarop om ’n Afrikaanse sokkiedanskunstenaar te wees,” het hy gesê toe hy sy Sama-beeldjie in ontvangs geneem het.

Darren vertel dat hy Madiba onlangs ontmoet het en skoon klein in sy teenwoordigheid gevoel het.

“Ek kon ’n tydjie met hom gesels, en wát ’n ondervinding was dit nie om in sy teenwoordigheid te wees en toegevou te word in ’n aura van menslike grootheid nie.”

Volgens dié sanger was hy skoon oorstelp oor dié uitnodiging. Hy gaan die Hyde Park-verhoog met heelparty wêreldsterre – onder andere Queen en Paul Rodgers, Annie Lennox, Simple Minds, Eddy Grant en Shirley Bassey – deel.

“Daar is sprake van ’n duet met ’n internasionale superster en ek sal moontlik ook ‘Standing on the Edge’ sing. En, wie weet, dalk vra hulle my om ook ’n Afrikaanse liedjie te sing as daar tyd is.”

Die ander Suid-Afrikaanse kuns­tenaars wat genooi is, is Johnny Clegg, Sipho Mabuse en die Soweto Gospel Choir.

Van die wêreld se bekendste politici, sakelui, sportlui en vermaaklikheidskunstenaars sal dié drie dae lange feesviering bywoon. Onder hulle is oudpres. Bill Clinton van die VSA, die Britse eerste minister, mnr. Gordon Brown, Oprah Winfrey, Robert de Niro, Will Smith en die F1-renjaer Lewis Hamilton.

Die fondsinsamelingprojekte is ten bate van die 46664-veldtog vir die bewusmaking oor MIV/vigs.

Ander organisasies wat by die konsert gaan baat vind, is die Nelson Mandela-stigting, die Nelson Mandela-kinderfonds en die Mandela-Rhodes-stigting.