Die Burger | Nuus | Mbeki ‘wou Selebi-saak stuit’

JOHANNESBURG. – Pres. Thabo Mbeki wou keer dat die Skerpioene komm. Jackie Selebi, polisiehoof, arresteer en vervolg.

Só voer adv. Vusi Pikoli, nasionale direkteur van openbare vervolging, aan in sy beëdigde verklaring wat gister op die eerste dag van die Ginwala-verhoor ter tafel gelê is.

Dié verhoor word in die vergadersaal van die Johannesburgse metroraad gehou.

Dr. Frene Ginwala is in September deur Mbeki aangestel om te kyk of Pikoli geskik is om sy werk te doen.

Pikoli is op 23 September 2007 deur Mbeki geskors – kort nadat die Skerpioene ’n lasbrief verkry het om Selebi te arresteer en sy kantoor en huis te deursoek.

“My skorsing het ten doel gehad om die ondersoek na en vervolging van komm. Selebi te frustreer,” lui Pikoli se verklaring. “Dit was om ’n stok in die wiel van die ondersoek te steek.”

Eerw. Frank Chikane, direkteur-generaal in die president se kantoor, het dít gister teenoor Ginwala ontken.

“In geen stadium het die president (Mbeki) gesê dat ’n amptenaar van die regering nie gearresteer en vervolg mag word nie.

“Ons het nie ’n probleem met die ondersoek nie, maar met die manier waarop die direktoraat vir spesiale operasies (die Skerpioene) verrigtinge gehanteer het,” het Chikane gesê.

Volgens Pikoli het hy uit sy pad gegaan om Mbeki en me. Brigitte Mabandla, minister van justisie, oor die ondersoek na Selebi ingelig te hou.

Hy het daarop gewys dat hy sedert 2006 Mbeki en Mabandla tien keer gespreek het om die Selebi-ondersoek te bespreek.

Pikoli het ook daarop gewys dat Mbeki in Maart 2007 geïrriteerd was omdat Pikoli geweier het om Selebi by ’n vergadering in te sluit waar die ondersoek na die polisiehoof bespreek is.

Dié vergadering sou wees tussen Pikoli, Mabandla en mnr. Charles Nqakula as minister van veiligheid en sekuriteit.

Pikoli voer ook aan Mbeki het in November 2006 ’n beëdigde verklaring van mnr. Clinton Nassif, voormalige veiligheidskonsultant van die vermoorde mynmagnaat mnr. Brett Kebble, onder oë gehad.

Tot op hede het Mbeki ontken dat hy enige beëdigde verklarings gesien het wat oor die ondersoek na Selebi handel.

Volgens Pikoli het die staat sedert verlede jaar verskeie kere die redes vir sy afdanking verander.

“Dit is duidelik dat dít (die ondersoek na Selebi) die rede vir my skorsing was,” lui Pikoli se verklaring.

Gister was die eerste dag van die drie dae lange Ginwala-verhoor. Dit word vanoggend hervat.

Ginwala sal ná die verhoor ’n verslag opstel wat aan Mbeki voorgelê sal word.

Mbeki sou dan eers die goedkeuring van die parlement moet verkry om Pikoli af te dank, indien wel.

As die afdanking afgekeur word, sal Pikoli tot 2015 aan die hoof van openbare vervolging staan.


	NUUS		STREEK		BUITELAND		KAMPVEGTER


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|