’n Dogter van Taliep Petersen het in April 2006 op haar bebloede pa afgekom kort nadat hy deur sy vrou, mev. Najwa Petersen, met ’n mes gesteek is, berig Carryn-Ann Nel.

Me. Jawaahier Petersen (22) het Maandagoggend aan ’n vol Kaapse hooggeregsshof vertel hoe sy op 13 April, twee dae voor haar pa se verjaardag, op dié gru-toneel afgekom het.

Volgens haar wou mev. Petersen haar man nog ’n keer met die mes steek terwyl hy haar probeer keer het.

Jawaahier Petersen het later die ambulans ontbied, het sy getuig. Sowel Taliep as Najwa is hospitaal toe na dié voorval.

Adv. Klaus von Lieres und Wilkau SC, mev. Petersen se regsverteenwoordiger, het gesê sy kliënt erken dat sy haar man met ’n mes bygekom het, maar kan nie onthou wat presies gebeur het nie.

Die saak voor regter Siraj Desai duur voort.